انشاء حساب



تسجيل الدخول



كتب بواسطة: سامح خليل
12 أكتوبر 2014
17108

سامح خليل

نعم؟ أكيد دلوقتي إنت مستغرب إن أول مقال بيتكلم عن طابور الصباح .. وممكن كمان شوية تقرر تقفل الصفحة ديه وتشوف حاجة مفيدة تعملها .. براحتك .. يالا اقفل .. بهزر يا عام إنت صدقت ولا إيه؟

المهم، أنا بصراحة قررت اكتب عن طابور الصباح لأنه من الاشياء اللي عمري ما فهمتها. الواحد يصحى من النوم مش طايق نفس أهله..أمه مشكورة تعملله فطار..وينزل يستنى الاتوبيس أو يمشي على رجله وهو ما زال مش طايق نفس أهله، ويوصل المدرسة وهو برضو لسه مش طايق نفس أهله.

توصل المدرسة بقى تلاقي المدرسين بيوقفوك إنت وزمايلك في طوابير زي العساكر..ولو فتحت بقك أو ضحكت..ليلة أمك سودا. بعد كده بقى لو إنت من أسرة ميسورة الحال وفي مدرسة خاصة هتلاقي نفسك مجبر انك تعمل شوية تمارين كده هي أبعد ما يكون عن تمارين الصباح المتعارف عليها عالمياً وتحس انك أهبل بطريقة بشعة.

ما زلت مش طايق نفس أهلك برضو..بس على مين؟..تستمر المعاناه بالنشيد الوطني اللي إنت طبعاً مش هتغنيه وهتحرك شفايفك بس عشان متلاقيش مدرس غلس جاي يرخم عليك عشان معندكش إنتماء (بالمناسبة ده هتلاقيه نفس المدرس اللي ضد الثورة وإنتخب أحمد شفيق من أول جولة).

وأخيراً أعزائي المشاهدين نوصل لفقرة "تحيا جمهورية مصر العربية" وديه أنا باعتبرها أكتر فقرة مضحكة في الموضوع كله لأنها عبارة عن مسابقة غير معلنة بين الطلبة على مين صوته أعلى من الباقي..طبعاً لأن ده تعبير عن الرجولة بشكل أو بآخر، طبعاً هيكون في ناس بتقولها بمنتهى الحماس بس مش حباً في الوطن..أبسولتلي...ده غالباً بيكون اللي مش طايق نفس أهله. وما بين هذا وذاك هتلاقي الواد الدحيح اللي ديماً قاعد في أول صف ومش بيسيب سؤال إلا ويجاوبه بيقول "تحية جمهورية مصر العربية" بكل حماس بس ده بيبقى عشان هو متخيل إن عليها درجات أعمال سنة أو ممكن تجي في إمتحان أخر الترم، وهتلاقي البنت اللي فيها سنة رجولة برضو بتقولها بحماسة زايدة عشان تحس انها زي الولاد.

غالباً الواد الدحيح ده بيطلع في الأخر برضو من بتوع الاستقرار وبيكون نفسه يشتغل في حملة أي واحد فلول بس معندوش وقت...بيذاكر.

أنا بصراحة عمري ما فهمت ليه بيخلونا نعمل أم طابور الصباح..هل زود انتمائنا؟ إطلاقاً! هل خلانا نشيطين عالصبح؟ أبداً!! أنا بصراحة رأيي إن الموضوع ده ليه كذا سبب، أولهم فكرة إخضاع الطلبة للأوامر..أي واحد بيخضع للأوامر غالباً بيكون محتاج حد يخضع ليه هو كمان..فغالباً بتكون مراته (في البيت) والطلبة في المدرسة. السبب التاني ممكن يكون إنه فعلاً السلطة الحاكمة على مر الزمن مقتنعة إن ده شئ هينمي الإنتماء عند الطلبة وطبعاً ده تصور خاطئ بدليل اننا بمجرد دخلنا ثانوية عامة فكسنا تماماً لهذا الشئ المسمى بطابور الصباح.

تحيا جمهورية مصر العربية.


تعليقات