عبلة عاطف يلتحق الطلاب المستجدين بالجامعات المصرية مع كل عام دراسي، ويعاني كثيرًا منهم من فجوة في الدراسة نظرًا لاختلافها في مرحلة قبل الجامعة عن الوضع الجديد للطلاب، ونجد الأساتذة في كثير من الوقت ينصحون الطلاب بما يجب ولا يجب فعله بالحرم الجامعي، وفي سابقة رصدأستاذ الفلسفة بجامعة كفر الشيخ الدكتور محمد كمال، 40 قاعدة ونصيحة للطلاب الجدد وذلك عبر صفحتة الرسمية على موقع التواصل الاجتماعي "فيسبوك".
وتابع خلال منشوره على "فيسبوك" اليوم، أنه كرر هذه النصائح لأكثر من مرة دون جدوى، مضيفًا: "البوست السنوي وبردو مفيش حد بيسمع الكلام وبيزعلوا".
قواعد الدراسة الأربعين لطلبة الجامعة المستجدين
1- بلاش تعمل ناصح علي الدكتور لأن وأنت رايح تعمل ناصح كانوا الدكاترة راجعين من المرة الخمسين بعد الألف فبلاش تفقع مرارتنا لأنك واحد من آلاف أو عشرات الآلاف مروا علينا.
2- الجامعة لا هى فرح ولا ماتش كورة يعني المناظر اللي بنشوفها بتاعة المكياج مغرق وشك وواخدة اتنين كيلو لاكيه ده في فرح شيماء صاحبتك مش في الكلية، وبلاش الضجكة الرقيعة اللي بنسمعها من آخر دور، وأنت بلاش البناطيل الساقطة والمقطعة وبنطلون أختك البنت.
3- أنت جاي الجامعة المفروض عشان تحضر المحاضرات مش عايز تحضر لا يكلف الله نفسًا إلا وسعها بس متزعلش لما النتيجة تطلع، وعامة في كل الأحوال هتتخرج 99% هتشتغل مندوب مبيعات أو كول سنتر يعني ممكن تشتغلهم وأنت طالب بردو تبقي تخلص مع اولادك الكلية.
4-يا ابني أنت جاي الجامعة عشان تذاكر وتنجح مش عشان تعلق فتكات رمش العين ولا عشان هى تصطاد عريس وشغل الأفلام العربي بتاع عبد الحليم ونادية لطفي، وأنك تخبط فيها والكتب اللي هى حضناها تقع من إيديها وتلموا الحاجة سوا والنظرات والعيون والكلام ده مش بيحصل لو عملتها غالبًا هنسمع صوت القلم على وشك واحنا في مكاتبنا.
5-اوعى تصدق الأفلام العربي اللي بيستخف دمه ونظام الباشا تلميذ ده، ممكن الدكتور يخليه يحزن كتير اوي، وبرجو مش هتلاقي تامر حسني قاعد بالجيتار على سلم الكلية والبنات بتسبله ولو قعدت على السلم امك اللي هتسب لك.
6- عيل يطرقع بصوابعه ويقولي عايز ادخل الحمام يا مستر هعصره اطلع منه طلبة كي جي وان.
7 - اسمها محاضرة مش حصة ولا درس.
8- بلاش تعمل ناصح على الدكتور.
9- الجرس يعني فيه حريقة مش فسحة ده لو فيه جرس إنذار للحريق اصلاً في كليتك.
10 - اسمه دكتور ودكتورة مش مستر ومس أو أبلة وأستاذ.
11- الشباب والله سور الجامعة ما سور المدرسة يعني مفيش نط من عليه، مش عايز تحضر المحاضرة متحضرش وخلصت.
12- اللي بيقعدوا في أخر بنج اوعوا تفتكروا إني مش شايفكم والله شايفك خصوصًا أنت يا اللي بتلعب شطرنج مغناطيس مع زميلك اللي جنبك وأنتى ياللي بتاكلي فول وطعمية.
13- بالمرة بلاش دخول على الفيس في المحاضرة لأن معظم الدكاترة عندهم فيس بوك وشوية وتبعتوا لهم وممكن يقبلوا الإضافة وبصة واحدة في الفيس هيعرف إنكم كلكم عليه وأنتم في المحاضرة.
14- احنا في جامعة مش في سينما يعني الخناقات اللي بتحصل عشان الحجز عيب وممكن تنطردوا كلكم من المدرج عشان تحجزوا مكان علي باب المكتب، وأنتوا بتاخدوا الكارنيهات
15- افتكر تاني إني قلت لك بلاش تعمل ناصح على الدكتور.
16- احنا في جامعة مش جامع يعني حسب جامعتك لو الصبيان في بنجات والبنات في بنجات التزم بالنظام، ولو قاعدين مختلط يبقي بردو متعلقش مش عاجبك شوف مكان فاضي واقعد فيه.
17- لو قعدت جنب بنت دي اختك بلاش نظام الاتوبيسات إياه عشان ممكن تقول كلمة تزعلك وتلاقي كل المدرج بيخدم معاك وهايبقي شكلك وحش جدًا.
18- بلاش شغل التسبيل لزميلتك طول المحاضرة ركز في المحاضرة عشان متتسئلش سؤال وأنت سرحان ويبقي شكلك بايخ....الأهم من كل ده استحمي والنبي عشان ريحة المدرج مش أكتر.
19- على الأقل حسسني إنك جاية تكتب أي كلمتين يعني على الأقل معاك أجندة وقلم تكتب بيه والأجندة لها فايدة تانية إنك هتقعد عليها بدل ما تقعد على الأرض، وهدومك تتوسخ وأنت قاعد عند الكافيتريا ولا في الجنينة إنما جاي طرزان عشان الأجندة تقيلة على إيدك هتزعل.
20- تفضل مكبر للمحاضرات طول السنة خد بالك مفيش ملازم تنفع معايا، ولو قلت في الامتحان ماخدناش الموضوع ده هيتعمل عليك أحلى حفلة وكل اللجنة هتضحك عليك لما تكتشف إني دكتور المادة اللي أنت بتشتكي له أن دكتور المادة مشرحش الموضوع وأنت مش عارفني اصلًا.
21- كل في بيتكم وأدخل الحمام في بيتكم احنا الدكاترة مش بنلاقي حمامات نضيفة أنت اللي هتلاقي ابقي قابلني.
21- عيل ولا بنت ييجوا يقولوا لي عايزين ناخد درس يا مستر ولا حضرتك بتدي في سنتر إيه ممكن اعلقهم في المروحة بتاعة المدرج، الدروس دي كانت أيام ثانوي هنا الكتاب والمحاضرة والمكتبة تقرأ فيها مراجع يا بطل.
22- نظام أنت أحسن دكتور في التاريخ وأنت مفيش زيك وأنت بابا وماما وأنور وجدي مبناكلش منه، وبتقل في نظري جدًا ومر علينا من العينات دي كتير وهيتطبق عليك النظام زيك زي غيرك.
23- بلاش نظام تمسك الأجندة وكتابة من أول المحاضرة لاخرها كل كلمة بتحصل وكح الدكتور، وقال الدكتور للي جنبي أنت نايم ليه شيل إيدك من جيب اللى جنبك شغل الكاتب المصري ده بيخليك متعرفش تركز في اللى الدكتور بيشرحه.
24- بلاش نظام التسجيل انت مش جاي حفلة عمرو دياب ولا تامر حسني ولا أنت مخبر جاي تسجل للدكتور عشان تروح تسلم تقرير عنه.
25- اوعى تنام في المحاضرة عايز تنام روح ومتحضرش المحاضرة أحسن عشان هضطر اقلق سيادتك واصحيك لان شخيرك جايب المبنى التاني.
26- العيال اللى بتشرب ممنوعات وبتعمل حاجات خليعة والله لارش عليكم مياه وعملتها قبل كدة فمفيش حد يعمل كدة عيب انتم طلبة جامعة ومحترمين وكبار.
27- لو بنت وقاعدة في المدينة افتكري دايما أهلك وانك جاية تتعلمي أول ناس هتتكلم عنك بطريقة وحشة الشباب اللي هتمشي معاهم ويرسموا عليكي دور الحب.
28- افتكر تاني اوعي تعمل ناصح علي الدكتور.
29- لو فيه أنشطة في كليتك شارك وعيش الجامعة لأن مش هيتكرر تاني بس إياك تأثر علي دراستك وإلا هتتفضح لما تخلص، وهم عاملين يافطة لتهنئتك بالحصول على الليسانس بعد كفاح 10 سنين.
30- رضا شئون الطلبة من رضا امك وابوك اوعي تتخانق معاهم مهما حصل لأنهم بردو هيطلعوا صح وانت الغلطان وهيطلع عينك.
31- العيال بتوع سنة أولى بلاش شغل الثانوي بالتخبيط على باب المدرج ويطلعوا جري..زميلك اللي كان واقف هيفضحك ويقول على اسمك اول ما هقول له هسقطك.
32- البنات بلاش الكعب العالي خصوصًا اللي في كعبه حديدة وتمشي بنظام تيك تاك وتخلي المدرج كله يبص وتشتتي لي المحاضرة هتزعلي اوي لما يضحكوا عليكي وبلاش طرقعة اللبان شكلك بيببقي زبالة وبلاش تصوير سيلفي بوز المعزة في الكلية الناس بتضحك عليكي يا هبلة منك لها.
33- اللي بيدخلوا المدرج والمحاضرة شغالة لو الدكتور سمح بالدخول ادخل من الباب الخلفي واقعد في اقرب مكان مش لازم تقعد جنب صاحبك وتقوم البنج كله.
34- بلاش شغل النط من فوق البنجات والكتابة عليها بالمسامير والقلوب وأحمد ومني حتي أخر العمر لأن أنت بتحفر في البنج ومني بتذاكر، ولما تسقط مش هتعبرك يا فاشل يا فاشل.
35- العيال اللي بيجوا من الكليات التانية وفاكرين آداب الكعب العالي والكلام القديم موت ده وبنبقي مش عارفين نمشي منهم هنرش مية ونكهربها.
36- بلاش القعدة على السلالم وتقفلوها وكل اللي طالع واللي نازل لازم يستأذن حضراتكم عيب.
37- الموبايلات الصيني اللي بتشغلوها على أغاني ويكأنكم في فرح ومشغلين اوكا واروتيجا وتشوش على المحاضرات ابقي خليهم ينفعوك لما تتقفش.
38- بلاش نظام كل شوية ترفع إيدك ونسأل في حاجة اتشرحت أو عن حاجة لم تشرح عشان تستعرض عضلاتك وتظهر ادام الدكاترة وكدة بتتكشف بسرعة والكل بيزهق منك.
39- هتقولي دول39 وانت كاتب إنهم أربعين هقولك جملة واحدة بلاش تعمل ناصح على الدكتور.
جزء من منشور الدكتور محمد كمال
اقرأ أيضًا :
استشاري تعديل السلوك يوجه نصائح للطلاب المقبلين على الجامعات
